काठमाडौँ – प्रतिनिधिसभाको अन्तर्राष्ट्रिय सम्बन्ध र पर्यटन समितिले संस्कृति, पर्यटन तथा नागरिक उड्यन मन्त्रालय र पशुपति क्षेत्र विकास कोषलाई कोषको नाममा रहेको जग्गा तत्काल एकिन गरी समितिमा उपलब्ध गराउन निर्देशन दिएको छ ।
सिंहदरवारमा आज बसेको समितिको बैठकमा सभापति राजकिशोर यादवले हालै नियुक्त भएका कोषका कार्यकारी निर्देशकको नियुिक्त सम्बन्धि प्रमाणित कागजात र अनुभवको विवरण तीन दिनभित्र समितिमा उपलब्ध गराउन निर्देशन दिनुभयो ।
समितिले गौशालास्थित धर्मशाला सञ्चालक आनन्द होटलसँग कोषले गरेको सम्झौताको सक्कल विवरण र पशुपति क्षेत्र विकास कोषको गुरुयोजना समितिमा उपलब्ध गराउन पनि निर्देशन दिएको छ ।
पशुपति क्षेत्र विकास कोषका सदस्य सचिव राजु कुमार खत्रीले कोष अन्तर्गत ३ वटा गुठी रहेको, कोषको जग्गा ३ हजार ६ सय ६७ रोपनी ४ आना रहेको, कोषको २ अर्ब ४१ करोड रुपैयाको मुद्धती खाता सञ्चालनमा रहेको जानकारी दिनुभयो ।
