काठमाडौं , माघ १९ । नेपाली कांग्रेसका १३ भातृ संगठनले आज देशभर प्रदर्शन गर्ने भएका छन् । संसद विघटनविरुद्ध नेपाली कांग्रेसका १३ भातृ संगठन एकजुट भएका हुन् ।
प्रधानमन्त्री केपी शर्मा ओलीको असम्वैधानिक कदमविरुद्ध आन्दोलित हुनुपरेको उनीहरूले संयुक्त विज्ञप्तिमार्फत जनाएका छन् ।
पार्टीको १३ गते बसेको केन्द्रीय समिति बैठकले १३ वटै भातृ संस्थाहरूको संयुक्त आयोजनामा सोमबार एकसाथ ७७ जिल्लामा प्रदर्शन गर्ने निर्णय गरेको थियो । सोही अनुरुप उनीहरू आन्दोलित बनेका हुन् ।
देशका विभिन्न स्थानमा हुने सभालाई पार्टीका शीर्ष नेताले सम्बोधन गर्ने कार्यक्रम रहेको छ।विज्ञप्ति निकाल्दै सोमबारको प्रदर्शनमा सहभागि हुन देशभरका सबै सदस्य, समर्थक, शुभचिन्तकहरुलाई कांग्रेसले आग्रहसमेत गरेको छ ।
कांग्रेसले यस अघि १६५ वटै निर्वाचन क्षेत्र, ३३० वटै प्रदेश सभा, ७५३ वटै स्थानिय तह र ६ हजार ७४३ वटै वडामा विरोध प्रदर्शन गरिसकेको छ ।
